گئچن ايل بو زمانلار بير مقاله قلمه
آلديم آديني قويدوم: گاموح، گئچمیش و بوگونکو یاشام*.
او مقاله ده اؤنملي و اساسي سورونلار اؤزره دانيشديم و دئديم کي
گاموح آرتيق بير اؤلو پارتي دير. مقاله نين
يايينلانديقي دؤنمده منه سالديران و يا مندن تشکر ائدن چوخ دو٫ آما منيم آماجيم
گاموحا ضربه وورماق يوخ٫ بلکي اوياري
وئرمک ايدي.
ايندي ايسه مع العسف او گون کي
سؤزوم گرچکلشير٫ گاموح داغيلير و گؤن به گؤن آيريلانلارين سائيسي آرتير. بو اؤزوجو
و قورخو وئريجي بير اولايدير. بوگون منيم سوروشماق ايسته ديگيم بودور: ندن من٫ بير
شخص کي گاموح ايله هيچ بير علاقه سي يوخدور٫ بير ايل اؤنجه آنلاميشام گاموح آرتيق
اؤلوب و قيريلما نقطه سينه چاتيب٫ آما سيز اؤزوز بونو بيلمه ييبسيز؟ آيا سيز بوقدر
گاموحدان اؤزاقدا سيز؟
آيا گاموحو سيزين آديزا يؤنه تنلري
تانيتديرماقا پلانيز وار؟
دکتر بئي٫
سيزين ديشاريا گلمه نيز چوخلارينين
پلانلاريني پوزدو و بونون قارشيسيندا ايسه چوخلارينين رؤيالارينا و هدفلرينه آنلام
وئردي. گئنجلر و ميللتچيلر سيزين وئرديگيز شعارلارا اوميد بسله ييب و گاموح چي
اولاراق پئشيزدن گلديلر. آما سيز اونلارا نه ائتديز؟
دکتر بئي٫
نئچه لر دفعه اؤزلشمه لرده سيزه
دئييلدي کي ديکتاتورلوق ايله باشلانان ايش دؤزگون سونا ائرمز. دئييلدي کي ليدئرليک
ايددعالاري ايله سياسي بير پارتي يؤنتيلمز٫ دئييلدي کي قؤزئي گؤنئي آيريمي يارارلي
ده يير٫ دئييلدي کي گاموح و گاموحا باغلي شعبه لرين چاليشماسينا ديققت ائتمک
لازيمدير٫ دئيلدي٫ دئييلدي و گينه ده دئييلدي آنجاق سيز قولاق وئرمه ديز. بير
بايراق توتدوز و بوراخمادوز٫ بيليرسيز نئچه لر فعال بونا گؤره سيزدن آيريلديلار؟
سياسي پارتي ني يؤنتمک اؤچون سياستمدار لازيمدير. دکتر بئي سيزين گئچميشيز مني
دؤشوندورور٫ سيزين مذهبي باخيشلاريز و ايناملاريز مني قورخودور٫ سيزين ايله ريه
باخماماغيز مني چکينديرير و بونلار باشقالارينين دويقولاريدا اولا بيلير. بونلارا و
داها چوخ کؤلگه ده ساخلانميش سورولارا جواب وئرمک ايله٫ بير داها آيدينليق گاموحا
گله بيلير.
دکتر بئي٫
يازميشديم کي اگر ديکتاتور دؤشونجه
لر بيرکنارا آتيليرسا و اگر ليدئرليک توپلومو يارانيرسا٫ ايللر بويو يارپاق آچيب و
دال وئرن گاموح ياشاماقا باشلاييب و داها دا گؤجلنير. دئديم کي مسؤليت قبول ائتمک و
گؤنجل سياستلر ايله٫ بو آذربايجانا گرکن تشکيلات آياقدا قالا بيلير. سيز آما هيچ
بير ده ييشيکليک ياراتماديز٫ ياراتاماديز٫ و حتي عکسينه منجيل ايشلريزه دوام ائتديز
يا ائتمه يه مجبور الدوز.
دکتر بئي٫
ديشاريدا اويونباز چوخدور٫
بيلرسيز٫ بيلمه ليديز. ديشاريدا ساتقين و مانقورت چوخدور٫ بيليرسيز٫ بيلمه ليديز.
ديشاريدا سياستلر گؤنجلليکدن چيخيب و گله جگه يؤنه ليب٫ بيلمه ديز و گئچميش
سياستلريزه ادامه وئرمک ايسته ديز. بيله بيله بيلمه مک آغير ضربه وورو٫ ايندي سونوج
گؤز اؤنونده.
دکتر بئي٫
بيلمه ليديز کي گاموح سيزين ده
يير٫ بيلمه ليديز کي وطن عسگري آدلانان چهرگانلي گرچکدن ده عسگر اولماليدير٫ بيلمه
ليديز کي آذربايجان و ميللتيميز گاموح دان اؤمور. گاموح ميللتيميزين يانيندا
اولمالي دي آنجاق سيزين و سيزه فيکير وئرنلرين يانليشلاري سونوندا٫ گاموح ميللتين
قاباغيندا داياندي.
دکتر بئي٫
بيليرسيز ايچريده و ديشاريندا
مينلرجه گئنج و ياشلي فعالين گؤزو گاموحدادير؟ بيليرسيز گله جکده دانيشيب
ساواشانلاريميز٫ ايندي سيزه و گاموحا باخيرلار. بيليرسيز کي گاموح هر نه ده اولاي
اؤز وئريبسه ده٫ يئني دن حياتا دؤنه بيلير؟ بيليرسيز کي گاموح حياتا دؤنمه ليدير؟
دکتر بئي٫
لوتفن بير داها گئريه باخين و
دؤشونون. باخين نه سهولر اؤز وئريب و نه يانليشليقلار اورتايا چيخيليب. باخين
باشاريلاريز نه اولوب و الده اولانلار نه دير. و سورا٫ بونلاري بير بيري ايله
تارتين. سيزجه هانچي طرف آغير باساجاق؟ من دئييم٫ گاموحون داغيلما نقطه سينه
يئتيشمک ايله بللي اولور سهولر و يانليشليقلار آغير باسير. بونون قاباغيني آلماق٫
سهولري دؤزلتمک و يانليشليقلاري باشاريا چئويرمک ايله ياپيلا بيلير. دکتر بئي لوتفن
قدرت٫ مقام٫ آد و اويونا باغلانمايين. اويونجولاري اطرافيزدان آتين و گاموحون گله
جگي اؤچون بير داها دؤشونون.
دکتر بئي٫
گاموح سيزين ده يير. گاموح و
اساسنامه ده يازيلان هدفلر اؤچون جان٫ مال و زمان قويان صادق فعاللار سيزين
اويونجاغيز ده ييرلر. بيلمه لي سيز ايندي کي دؤرومدا٫ شوونيسم ايله و ساتقين
حاکميتلر ايله ساواشما دؤنمينده گاموح داغيلماماليدير. اگر ايچري سورونلاري گيزلتمک
ايله بو گؤنه چاتيبسيز٫ بويورون سورونلاري٫ خيانتلري و يالانلاري ميللتين اؤنونده
آچيقلايين. بيز بيليريک سيزه مادي تضييقلر بيله رک ياراتيليب. بيز بيليريک سيزين
آدوزا پوللار آلينيب. بيز بيليريک سيزين آدوزا ايشلر ياپيليب و باشقالارينا اهانت
اولونوب. بيز بيليريک کي سيز بير کسکين سياستچي اولماديقيز اؤچون اويونا آتيليبسيز.
بيز بيليريک کي ايندي سيزدن و گاموحدان يارارلانانلارين سايي سي آز ده يير. دکتر
بئي٫ شرفلي و ايناملي گاموحچولاري ساتقينلار ايله باش باشا بوراخمايين. قدرتي اؤز
ايچيزده بؤلون٫ تک حرکت ايله بو دؤنمده تشکيلات قورونماز. بو گون بير نفر گاموحدان
آيريليرسا٫ دئمک ميللتچيليگيزده شوبهه ياراتميسيز٫ بو شوبهه ني يالقيز سيز تميزله
يه بيليرسيز.
دکتر بئي٫
سيزه ليدئر دئييب ده آرخادا گؤلنلر
چوخدور. سيزده بيليرسيز٫ بلکي ايندي يانيزدا اوتوران اوجور بيري سي دير. دکتر بئي٫
سيزين يانليشليقلاريزدان دولايي گاموح داغيلير٫ کئشکه گؤن آذ تي.وي ده وئرديگيز
استعفاني گئري آلماسايديز!! اوندا بو گون کيمسه سيزي سؤچلايا بيلمزدي٫ ندن کي سيز
داها ليدئر ده ييرديز. آنجاق ياراماز اويونجولار٫ آنلاماز يانليلار سيزي ساخلاديلار
تا بو گون سيز و يالقيز سيز سؤچلو تانيناسيز. دکتر بئي٫ هر تشکيلات داغيلا بيلير٫
هر تشکيلات بؤلونه بيلير٫ آنجاق گاموح بونلارا بنزه مه مه ليدير. بونا باخماياراق
کي من گاموح ايله مخالفم و بونون ندنلري ايسه ايلک اولاراق اوتاي بوتاي آيريم
ياپماسي٫ غير دموکراتيک قورولوشو و پوزقون ايداره اولنماسيدير٫ آنجاق بونو آنلاماقا
قدر دؤشونجه صاحيبيم کي دئيم گاموح بو دؤنمده و بو يول ايله داغيلماماليدير.
دکتر بئي٫
آذربايجان سيز و يا باشقاسينين
ايسته يي ايله بؤلونمه ييب يا دا ياپيشماياجاق٫ آنجاق ميللتيميزه بورج اولاراق
بيرليکدن دانيشمالييک. بيرليک و بؤتوولوک ايله ايلريله مه لييک. گؤنئي قؤزئي
آييريمي ايله سيز اورتادا قالديز. يو.ان.پي.او-لار کيمين يونگول اويونلار سيزين
وجهه زي داها دا کورلادي. دانيشيقلاريزدا ديکته اولونموش سؤزلر ايله آيريليق سالان
آدلانديريلديز. ايندي ايسه سيزه اساسنامه پوزان آدي وئريلدي. آيا اساسنامه ني يازان
بيلمه لي ده يير کي اساسنامه ده نه يازيب؟ سيز ندن تورکچولوک و ميللتچيليک شعاري
ايله مئيدانا گيريب و سورا گؤنئي چي قالديز؟ و ندن ايکي اوزلو دوستلارين اويونونا
اويوبدا دئنيلمز سؤزلر ديله گتيرديز؟
دکتر بئي٫
گاموح هله ده ياشاما ايمکانلاري
تاپا بيلير. يئتر کي بو گؤنون ايستکلري ايله تانيش اولاسيز. يئتر کي گاموحون گرچک
گؤجونو بيله سيز و يئتر کي دوستو دوشمندن آييرلا بيله سيز. گاموحدان آيريلانلاري
دوستلوق ايله بير داها توپلايين٫ دموکرات انسانلار کيمين دانيشين و سورونلاري
چؤزون. ميللتيميز و دوشمنيميزن قاباغيندا آنلي آچيق يا بيتيرين يا گئري دؤنون.
آذربايجاندا تشکيلاتلار يارانماسي
شرط دير. آنجاق ۳ کيشيليک تشکيلاتلارين (سيزده بيليرسيز کيملري دئييرم) اولماماسي
داها يارارليدير. گاموح بويوک تشکيلات اولوب. او قدر بويو کي سيز اونو کنترل ادئه
بيلمه ديز. بو تشکيلاتا يازيقدير کي بؤلونسون يا داغيلسين. گؤج بيرليکده دير.
بو گون آذربايجانا و بيزه استقلاچي
و دموکرات گاموحلار لازيمدير.
تبريزلي باي بک
۲۴/۰۴/۲۰۰۷
گلاسگو
href="http://www.baybak.com/Baybak/?p=1568
*
